الأحد، 30 مايو، 2010

فيزا كارد للحاجة سنيه ..وسلملى على الحكومة الذكية




image
الحكومة الذكية بتاعتنا عملتلنا نظام الفيزا كارد فى وزارة المالية تحديدا فى قطاع التأمينات الإجتماعية
الحاجة سنية بقه وهى رايحة تقبض فلوسها قالولها إنتى بعد كده هتاخدى فلوسك من الفيزا كارد
قالتلهم إيه ...كلت إيه ؟ والله يا ابنى ما كلت حاجة خالص
يقولولها يا حاجه كالتى ايه ..لا هتقبطى فلوسك بكارت ضغير كده من ماكينة هتبقى موجوده تحت
والحاجة سنية محتاره يا عينى ومش عارفة تعمل ايه
قوقولنا بقه يا حكومة اللى زى الحاجة سنية بقه يعمل غيه ..!!؟؟
لا عارفين ولا فاهمين يعنى إيه فيزا كارد ولا حتى إزاى هيستخدموها ؟؟
ويا عينى بقه على النظام ده وتطبيقه ..بجملة النصب اللى موجود فى البلد
النصب والسرقة هيبقوا الضعف خصوصا للزى الحاجة سنية
هيجى واحد نصاب يقولها مالك يا حاجه محتاره ليه تعالى وانا هقبضلك الفلوس
تقوله اه يا بنتى ربنا يخليك أصلى مش عارفة أعمل إيه مع البتاعه دى اللى مش راضيه تدينى الفلوس
وبكل طيايه هتديله الحاجة سنيه الكارت والرقم السرى علشان يقبضلها الفلوس
وطبعا هياخد الفلوس ويمشى
اما بقه لو صعبت عليه الحاجه سنية وكا ن نصاب قلبه طيب !!..هيديها قرشين
وهى طبعا علشان ست كبيره ومش شايفه كويس لا هتعد ولا حاجه هتروح ماشيه !!!
الحكومه بقه هترد تقولك لأ بقه إنتوا دايما ظالمينا كده !! ما إحنا عاملين نظام التوكيلات يعنى الناس الكبار اللى زى الحاجة سنيه هيعملوا توكيلات لحد قريبهم
يقبضلهم الفلوس .. طيب يا حكومتنا يا حلوة ما هوه فيه ناس كتييييييير زى الحاجة سنيه برضه من اللى بياخدوا معاش السادات وغيره
ملهمش حد يعملوله توكيلات هيعملوا إيه ؟؟؟؟
ولا والاطرف من ده كله إن نظام أجهزة الفيزا كارد هيتعمل فى المدن وبس أما القرى والاقاليم فلها نظام بقه يحرق الدم 
أجهزة صغيره كده شبه الموبايل فيها شبكة وفيها شحن صاحب المعاش هيدخل فيها الكارت يطلع ورقه بالمعاش اللى المفروض يقبضه
والمندوب يجى ويديله معاشه ..!!!!
طيب ما ده كان مدون بالكشوفات
ولا هيه مصاريف على الفاضى وخلاص
ويرجعوا يقولولك نجيب منين للحد الأدنى للأجور
مصاريف .زمصاريف ..مصاريف ملهاش اى تلاتين لازمه
ويرجع الوزير الغالى يقولك المديونيه زايده
75 مليار جنيه عجز فى الميزانية
73% إنخفاض فى المنح
أمال ليه يا وزيرنا يا غالى بنصرف فى حاجات ملهاش لزمه
لكن علشان يبقى الحل ده تكنولوجى وزكى فعلا
يبقى نشغل شباب من اللى قاعد على القهاوى دول يعلم الناس ازاى يستخدموها ويساعدهم
وبالليل نعلم دوريات الأمن تساعد الناس
لأن الميزه فى الموضوع ده - الميزه الوحيده - ان الناس ممكن تقبض معاشها فى اى وقت
لكن الميزة دى نسبية جدا لأنها هتفيد الناس المتعلمين أكتر من اللى زى الحاجة سنيه
وتعمل إيه الحاجة سنيه مع الحكومة الذكية ديه
يا حكومتنا قبل ما تعملى فيزا كارد للحاجة سنيه ..حليلنا الأول مشكلة الأمية

0 التعليقات:

إرسال تعليق