بعد الاعتداء الإسرائيلي على قافلة الحرية والذى أسفر عن قتل 19 وجرح 50 ..
قافلة الحرية التي كانت تحمل مساعدات لقطاع غزة الذي يعيش فيه أكثر من مليون ونصف فلسطيني والذي يحاصره الكيان الصهيوني منذ 4 سنوات.
ومنذ اللحظات الأولى وتحركت كل دول العالم رافضة الاعتداء الإسرائيلي وأكثر ردود الأفعال شدة كان من تركيا .. أما مصر فقد اختلف نائر مع نئير كالعادة هل كان رد فعلها مناسب أم لا؟
نائر: الواحد حزين على اللي حصل لأسطول الحرية .. الله ياخد اليهود .. بس الله ينور على مصر استدعت السفير الصهيوني وبلغت احتجاج مصر الرسمي .. شوف العقل والحكمة ولا بقى زعيق ولا انفعال.
نئير: يا عم أنت حتفرسني ليه؟ .. بتقول مصر إيه .. ؟؟ حكمة إيه؟! وعقل إيه؟ يا نائر حرام عليك هي مصر عملت حاجة؟
نائر: وأنت عايزنا نعمل إيه يعني؟ .. قولي بقى نحارب اليهود ومصر تضيع وحالها يتدهور من الحروب؟؟ كفاية الحروب اللي حاربتها مصر عشان العرب.
نئير: أولاً أنا ماقولتش نحارب وإن كنت مؤمن إن إخواننا في غزة المفروض نفديهم بأروحنا وفعلاً المفروض نحارب عشان نحرر كل أرض فلسطين والجهاد من أجل من اجل تحرير الأرض فرض .. لكن على الأقل يكون لينا موقف سياسي قوي زي تركيا.
ثانياً يا نائر أنت مصدق نفسك ؟! مصر حاربت من أجل العرب .. والعرب كمان وقفوا مع مصر في حرب 73 وساعدوا مصر كتير بلاش بقى النعرة الكدابة دي.
نائر: طيب لو فرضنا إننا ندافع عن فلسطين .. ندافع عنها لوحدنا برضه وبعدين لو دخلنا حرب البلد حتتدمر اقتصادياً.
نئير: يا سلام ياخويا .. تعالى شوف الرخاء والسعادة اللي مصر فيها .. أنت بتضحك على نفسك ما البلد متدمرة من اللي حاكمنها وبيسرقوها
نائر: أنت غريب جداً .. يعني عايزنا نعمل إيه؟!!
نئير: أنا ممكن اقولك مليون طريقة نرد بيها إعتبارنا وكرامتنا بدل ما احنا طول الوقت عمالين نشجب ونندد..
- ممكن نوقف تصدير الغاز المصري لليهود
- نقطع معاهم العلاقات الإقتصادية
- نسحب السفير المصري من تل أبيب
- وأهم من كل ده نفتح معبر رفح بشكل دائم لمرور كل المساعدات الإنسانية لإخواننا في غزة
0 التعليقات:
إرسال تعليق