الأحد، 26 سبتمبر 2010

التعذيب سياسة دولة أم حالات فردية ..(نائر ونئير)





نائر: والله اللى بيحصل من الحكومة ده حرام ، كل شوية يموتوا واحد فى القسم ، هو أحنا فراخ.

نئير : صلى على النبى فى قلبك كده وأهدى شوية الموضوع مش مستاهل .

نائر : مش مستاهل أزاى أنت مسمعتش عن خالد سعيد واللى قبله واللى قبله.

نئير : ياعم سمعت بس الموضوع مش مستاهل ده كلها حالات فردية ، شوية مخبرين أشتبهوا فى الواد ، صحيح الأسلوب كان غلط بس ده مش مستاهل كل المظاهرات واللى بيحصل ، المخبرين ح يتحسبوا وخلصنا.

نائر : أيه حالات فردية ، كام واحد أتعذب فى الأقسام فى الكام سنة اللى فاتوا ، ياحبيبى ده سياسة دولة وحكومة عايزة تخرسنا وتكتم نفسنا علشان يعملوا اللى هما عايزينه ، وكل مرة نلاقى مخبر أو ضابط يتحبسوا كام شهر وشكرا على كده .

نئير : أمال أنت عايز أيه الضابط أو المخبر هو اللى غلط يتحاسب وخلاص .

نائر : لأ طبعا سلوك الضابط أو المخبر مسؤلية مدير الأمن ووزير الداخلية ورئيس الجمهورية كمان ، لو الضابط أتعلم فى الكلية أزاى يمشى وراء الحقيقة والدليل مكنش ده حالنا ، لكن بيتعلموا فى الكلية أزاى يعذب اللى قدامه لحد مايلبسه القضية وخلاص .

نئير : متنساش أن قوة الأمن حمتنا من الإرهاب والخطر وعايشين فى أمان.

نائر : أمااااان!!!! فبن الأمان يمكن الأرهاب قليل ، ولكن كل يوم كام حادثة قتل وسرقة واغتصاب وتحرش ، فين الأمان ، ولنفترض أن فى أمان من الحرامية والنحرفين ، لكن بقى فى أرهاب الشرطة فى أى لحظة ممكن ضابط أو مخبر يخش بيتك أو يمسكك فى الشارع يضربك ويبهدلك ويحبسك كمان وملكش دية ، المشكلة فى أرهاب الدولة.

نئير : أرهاب دولة ... ياعم الكلام ده كبير أوى ، زى ماقولت أى مكان فى أخطاء وتجاوزات والشرطة يعنى مش ملائكة ، فى أخطاء وتجاوزات زى أى مكان فى الدنيا.

نائر : بس التجاوزات لما تمس حياة الناس وأمنهم وكرامتهم مينفعش نسكت ، لازم نصعد الموقف والشعب كله يقوم ، ونطالب بمحاكمة وزير الداخلية كمسؤول مباشر عن كل حوادث التعذيب والأعتقال والتجاوزات.

نئير : أنا شايف أن ده أحلام ، وكمان الوزير مش مسؤول أحنا نطلب محاكمة الضابط والمخبرين وخلاص.

                                                  

3 التعليقات:

الميكروباص يقول...

ولله الموضوع شائك
لو البوليس بطل ضرب هاتبقى مشكله زي ما حصل مع بتوع الالتراس لما تجمعوا وكسروا الدنيا في النادي الاهلي وفي محطة الاسماعيليه
ولو البوليس ضرب هاتبقى مشكله بردو، لأن الدنيا هاتقوم عليهم في كل مكان ومش في مصر بس

يبقى الحل ايه

نفتح الباب ولا نقفله؟

غير معرف يقول...

ثقافة الهزيمة.. أسكندرية ليه؟

متحف الأسكندرية القومى والمتحف اليونانى الرومانى و متحف المجوهرات الملكية و متحف الفنون الجميلة و متحف الأحياء المائية و متحف محمود سعيد ، و قلعة قيتباى و قصر المنتزة و مكتبة الأسكندرية الجديدة و الميناء الشرقى و حديقة أنطونيادس و نصب الجندى المجهول.


ومن الآثار الرومانية الموجودة بالإسكندرية المسرح الرومانى و عمود السوارى و معبد الرأس السوداء وحمام كوم الدكة الرومانى والذى أقيم على طراز الحمامات الرومانية القديمة ، و مسجد سيدى بشر ومسجد سيدى جابر ومسجد القائد إبراهيم ومسجد المرسى أبو العباس، وكاتدرائية الكرازة المرقسية وكاتدرائية اليونانيين الأرثوذكس و كنيسة سان مارك.

محطة الرمل وكامب شيزار وسان ستيفانو وسيدى بشر ، و طريق الجيش الممتد بمحاذاة الكورنيش ، و سى جل للأسماك فى أبوقير و بحرى، و جيلاتى عزة و جيلاتى النظامى و قدورة للأسماك فى بحرى ، و شارع سعد زغلول و شارع صفية زغلول وفول محمد أحمد و حلوانى طلعت وهريسة الحلبي و البن البرازيلى فى محطة الرمل، و حلواني صابر بالأبراهيمية، و مشويات أبن البلد بمصطفى كامل، و سان جيوفانى فى ستانلى ، و مول سان ستيفانو ، و مشويات حسنى بالمندرة ،و مشويات بلبع فى سيدى بشر قبلى، و حلواني شهد الملكة فى ميامى و فيكتوريا. وركوب الترام من غير محطة محددة فقط كى تتفرج على الأسكندرية من شباك الترام و أهل الأسكندرية الطيبين.

هذة بعض ما تحتويه مدينة الأسكندرية من معالم سياحية و مع ذلك لا تجد مدينة الأسكندرية على خريطة المدن السياحية الجديرة بالزيارة فى مصر فى مكاتب السياحة بالخارج و التى تنظم لها رحلات سياحية..

باقى المقال ضمن مقالات ثقافة الهزيمة بالرابط التالى

www.ouregypt.us

فشكووول يقول...

السلام عليكم
اهلا بالسناهر
اتفق معاك ان هذا ارهاب دوله .. يعنى انت عايز دوله اهم حاجه فى الدنيا فيها راجل واحد بس والراجل ده اهم من الدوله كلها يبقى حالها ايه .. لاحظ ان دى طبيعة الشرطه المصريه .. خد بالك لما بتشوف اى فيلم قديم او حديث واى حد يجيب سيرة القسم او الشرطه بيحط ايده على قفاه .. يعنى دى مش حالات فرديه .. دى حاله عامه حتى ان الافلام دائما تشير الى ذلك ( القفا) وهذه بلا اى جدال طبيعة الشرطه المصريه التى تختص باولاد الزوات ولا يدخلها اولاد الشعب وان ضباط الشرطه بشوات ولاد بشوات ولاد بشوات .. بالضبط زى المستشارين برضه بشوات ولاد بشوات ولاد بشوات وهكذا دواليك .. بزمتك .. دى بلد دى .. اوعى تقول مصر هى امى نيلها جوه دمى .. صحيح ان نيلها جوه دمى لحد الدم ما بقى ميه خالص والمصريين ما بقاش عندهم دم..
تحياتى

إرسال تعليق