الأربعاء، 30 يونيو، 2010

رؤية ممكن تكون مجنونة... ومتقوليش يغبى عشان بتعصبنى

  


 حتقولوا انى غبى حتقولولى  حصلك إيه ؟؟ حتقولوا علي إيه؟؟ ..  لو قلت لكم: 


- إن مصر دولة ديموقراطية .. واللي عايز يقول حاجة بيقولها .. واللي عايز يتكلم في حاجة بيتكلم

- إن الانتخابات في مصر نزيهة وشفافة .. ومش بتتزور ولا بتتحور ولا بتتغير .. وبتستمر وبتتوغل وبتنتشر

- إن الحزب الوطني .. واطي بجد .. قصدي وطني بجد .. وبيخدم المواطن الكحيان

- إن الحكومة حكومة شريفة .. يقودها نظيف .. ولا فيها وزير فاسد ولا مرتشي ولا حرامي

- إن الإعلام المصري الرسمي إعلام محايد ورائد ومخبر كمان

- إن المواطن المصري يعيش أزهى عصور الحرية - بقول الحرية- في عهد الرئيس محمد حسني مبارك

- إن الأكل نظيف ومفيهوش مبيدات مسرطنة تؤدي إلى الوفاة .. واللي بياكل ويموت يبقى هو السبب لأن مناعته ضعيفة

- إن الماء نقي وملهوش طعم مقرف ولا ريحة معفنة ولا لون غريب .. ولا يؤدي إلى إصابة 35 ألف مصري سنوياً بالفشل الكلوي

- إن مصر دولة سيادية ولا تنفذ أوامر أمريكا .. وعمر كلمتها ما تنزل الأرض أبداً .. ومفيش حد راجل عليك يا مصر 

- إن مصر لا تحاصر غزة ولا تطبع العلاقات مع اليهود 

- إن الغاز المصري حرام على إسرائيل .. وإننا نرميه في البحر ولا يستفيد منه يهودي واحد 

- إن السيد جمال مبارك مجرد مواطن عادي زي أي مواطن .. عايش زي أي مواطن .. بياكل زي أي مواطن .. ساكن زي أي مواطن .. ووصل للي هو فيه لأنه .. زي أي مواطن

- إن جهاز أمن الدولة .. جهاز محترم ومؤدب وبيخدم الشعب بكل تفاني .. ولا بيمسك حد ولا بيضرب حد ولا بيعذب حد

- بعد المقال ده مش حيمسكوني ولا يكهربوني ولا يودوني ورا الشمس .. ولا يحطوا السيخ المحمي في صرصور ودني

4 التعليقات:

افروديت يقول...

أناحاسة أن في واحد من أمن الدولة كان واقف فوق دماغك وأنت بتكتب لذلك أبدعت والله..ولوكنت بتكلم بجدوطبعآأشك جدآمش كنت هعدي ع المدونة دي تاني بس ياتري الراجل اللي ع دماغك مشي ولا لسه...هههههههههه..سلام كان الله في عونك

ّابن مصر يقول...

لا والله انا الحمد لله محصليش الارف وقابلت اى حد فى امن الدوله ولا حاجه ومفيش حد وقف على دماغى ولا على رجلى بس انا حاسس بكل مصرى عايش فى البلد دى واكيد كل مصرى عارف مين الحرامى ومين المرتشى ومين اللى فعلا بيخدم البلد دى وعايزها تبقى احسن بلد فى الدنيا مش محتاجه كلام وشكرا على المشاركه

sal يقول...

ايه الشفافية دى
ايه الكلام المهم دا

هو حضرتك داخل انتخابات


تحياتى

ّابن مصر يقول...

لالالا انتخابات ايه

وهوا انا لازم ادخل انتخابات عشان اقول الكلام دا

إرسال تعليق