الثلاثاء، 15 يونيو، 2010

انا مصر ومصر انا


انا الشعب والشعب انا
انا مصر ومصر انا
انا المصري العنيد المصر
وانا المصير القاسي الصعب

انا التزوير في الانتخابات

انا اللي زور..واللي حور
واللي عاند واللي حجر
ورفض يبيع ضميره
عشان شويه قرشنات

انا الصرخة والاهات

انا الضحكة والكدبه
علي وش البهلونات

انا الشعب والشعب انا

انا مصر ومصر انا

انا الصوت والسكات

انا الخوف والعياط
والفزع والجزع
قدام البهوات
والبكوات والبشوات

انا الشعب والشعب انا

انا مصر ومصر انا

انا النسمة علي شط النيل

وسحابة صافيه علي موجة بتميل
ولمسة دافية من شاب نحيل
بتوعد بنت بوش بشوش
حلو وجميل
بتقول..متخافيش هجبلك المستحيل
هحقق امانيكي..وهعيشك في هنا 

انا الشعب والشعب انا
انا مصر ومصر انا
انا الحركة في الشوارع
وصوت الادان في الجوامع
ودق العمل في المصانع
ورنة اجراس الكنايس
وتعليم بايظ في المدارس

انا مصر ومصر انا

الزحمة في اشارات المرور
وعشرة جنيه متكرمشة
من سواق غلبان معزور

انا الشعب والشعب انا

انا اعتصام واحتجاج وعذاب
علي رصيف مجلس كداب
بيقول ببجاحة وتناحة
انا الشعب

انا اللحية والجلبية

والنية المستخبية
والفتوي الفضائية
والغنوة المتشخلعة
وجمهور..لبس البردعة

انا الشعب والشعب انا

انا مصر ومصر انا

انا اللي عليت وبنيت

وغزيت واتغزيت
في كتب التاريخ

انا الشعب والشعب انا

انا الحاضر
اللي من غير ما يكبر
بيشيخ

انا الحرية ف الكلام

والكلام الحر
انا الحال اللي مش تمام
والوضع المر

انا الشعب والشعب انا

انا مصر ومصر انا
انا اللي هزيت التاريخ
واللي هتهزأ في التاريخ

انا الشعب والشعب انا

انا مصر ومصر انا 

  كلماتى 
كيمو البرننس
لسان عايز قطعه

0 التعليقات:

إرسال تعليق